Leratosello ke padi ya bafsa ye e theilwego godimo ga komatona ya lerato. Seo mongwadi a se rotošago, ke gore motho ofe goba ofe o na le tokelo ya boikgethelo. Ga go na taba gore ditlamorago di ka ba bose goba tša galaka. Se se hlatselwa ke lenyalo la Kgaladi le Senoinoi. Ee, ka mehla, mmapelo o ja serati, senyakelwa ga a se rate. Ka lehlakoreng le lengwe, kgoši ya mofsa e lego Segodi, o fenya Sebjalebjale yo a tšwelelago bjalo ka mogateledi. Ka gona, Segodi le dinatla tše dingwe tša bafsa ba go etša Kgaladi, Senoinoi le Diphofa, ba emela phenyo ya ditokelo tša botho. Molaetšamogolo wo mongwadi a o tlogelelago mmadi ke wa go re: ke phošo ye kgolo go kgetholla motho ka lebaka la gore e le mofsa goba yo mogolo. Go feta mo, ke bošaedi go ela motho ka gore e le modudi wa kgale wa naga goba e le mofenyi, lethopša goba mofaladi.